Llaviana apuesta pol turismu activu pa visitar los requexos del conceyu

El conceyu cuenta con un gran patrimoniu cultural y industrial

Llaviana ye'l conceyu bisagra nel Valle del Nalón, asitiáu xusto en metanes, con tantos recursos industriales como naturales. Últimamente ta potenciando'l turismu activu, en concreto'l que tien que ver cola bicicleta de monte, al traviés de los 'Senderos del Carbón'.

El 1 de payares, Llaviana acoyerá, per primer vegada, la salida d'una etapa de la Vuelta a España, afitándose asina como referente nel ciclismu de naturaleza, aprovechando un paisaxe protexíu y privilexáu como'l de Peñamea, el picu más altu de Llaviana con 1.560 metros.

El conceyu tamién tien una serie de siete itinerarios pa conocer el so gran patrimoniu cultural y industrial.

Otros emblemes, nel ámbitu arquitectónicu son el torruxón d'El Condao, unu de los pocos exemplos de monumentu históricu artísticu militar que queden n'Asturies, o La Ponte d’Arcu, d'orixe medieval y auténticu iconu de Llaviana.

La capital del conceyu, La Pola, tamién sedrá mui pronto más atractiva pa vivir y visitar, porque cuenta con un proyectu pa peatonalizar y facer más accesible'l centru y crear asina la villa de consumu de referencia de tol Valle del Nalón.