Llendaes les visites nos centros de mayores a una persona por residente

Nel ERA tamién se reforzaron les midíes de control d'entrada y salida

La Conseyería de Derechos Sociales y Bienestar acutó visitar nos centros de la rede del organismu autónomu Establecimientos Residenciales pa Vieyos d'Asturies (ERA) a una persona por paciente, una midida que tamién va ser treslladada a les instalaciones privaes.

Según informó'l Gobiernu del Principáu nun comunicáu, nel ERA tamién se reforzaron les midíes de control d'entrada y salida con un fondu rexistru na recepción de los centros, estremáronse les midíes d'hixene de manes enantes y dempués del contactu colos residentes y adoptáronse refuerzos d'hixene respiratoria.

Ye una nueva batería de midíes adoptada tres una xunta conxunta celebrada esti llunes ente toles comunidaes autónomes y l'Institutu de Mayores y Servicios Sociales (Imserso), informó esti llunes el Gobiernu del Principáu, que recordó qu'Asturies nun rexistra nengún casu d'infección por COVID-19 en centros y residencies de persones mayores.

La xerente del ERA, Ana Suárez Guerra, esplicó que toes estes midíes que se van aplicar nos centros de la rede pública darréu "tamién se van tresmitir a los centros privaos" y apeló a la responsabilidá de la población p'amenorgar la llegada de xente a los centros de día y sociales.