Llibertá provisional pa los cuatro prindaos na Operación Hulla

La xueza catién el secretu de sumariu

La titular del Xulgáu d'Instrucción númberu 3 d'Uviéu, Begoña Fernández, dexó en llibertá provisional a los cuatro prindaos el martes pasáu na Operación Hulla, qu'investiga'l presuntu desvíu, apropiación y ocultación de fondos públicos y privaos del Montepío de la Minería Asturiana.

L'ex-presidente del Montepío de la Minería Asturiana José Antonio Postigo, l'ex-asesor fiscal de la mutualidá J.M.F.F., y Juan Antonio Fernández, propietariu de la constructora que fizo'l xeriátricu de Felechosa, quedaron en llibertá ensin fianza, cola obligación de comparecer énte'l xulgáu los díes 1 y 15 de cada mes y la xueza decretó amás la retirada de los sos pasaportes.

El cuartu prindáu ye l'arquitectu de la residencia, Manuel Sastre, que quedó en llibertá ensin fianza aunque en calidá d'investigáu.

La xueza, que caltién el secretu de sumariu, tomó esta decisión tres interrogar a los cuatro acusaos per separtao dende primer hora de la tarde, según informaron los abogaos a la salida del Palaciu de Xusticia d'Uviéu, al rodiu de les 1:00 hores.

Los fiscales anticorrupción desplazaos dende Madrid pa los interrogatorios, Carmen García Cerdá y Ignacio Stampa, pidieren prisión provisional pal ex-presidente de la mutualidá, el constructor y ex-asesor fiscal, eludible col pagu d'una fianza d'un millón d'euros nel casu de los dos primeros y de 400.000 nel segundu.

La "Operación Hulla" ta rellacionada cola investigación del desvíu, l'apropiación y la ocultación de fondos públicos y privaos del Montepío ente 2005 y 2014 y entamó tres el presuntu blanquéu de capitales per parte del ex-secretariu xeneral del SOMA-UXT JoséÁngel Fernández Villa, qu'en 2012 regularizó 1,4 millones na amnistía fiscal mientres que Postigo regularizó otros 360.000 euros.

Na investigación tamién figura como investigáu'l que fuere máximu responsable del sindicatu mineru más de 35 años, que güei tamién pasó pel Palaciu de la Xusticia d'Uviéu, pero pa sometere a un esame forense enantes solicitáu pola so defensa, que considera que'l so estáu físicu y mental nun-y dexa declarar.

La operación céntrase na construcción del xeriátricu "La Minería" nel llugar asturianu de Felechosa, n'Ayer, que supunxo una inversión de 31 millones d'euros con cargu a los fondos mineros.

L'axudicación del proyectu a la empresa Alcedo de los Caballeros llevóse alantre nel mandatu de Postigo y, según los sos sucesores, foi de forma llegal, pero na so fórmula de tramitación vese "della intencionalidá".

Asina, según los actuales responsables del Montepío, fízose "un baremu a la carta" que posibilitó que les obres se dieren a la compañía que presentó la oferta económica más alta de les cinco qu'optaben y que daba calter "prioritariu" al desendolcu del centru d'hidroterapia non inxertu de mano nel proyectu.

Amás, hasta 2009 los proyectos a executar con cargu a fondos mineros namái los facíen alministraciones públiques, pero esi añu camudóse la normativa de forma que pudieren faceles instituciones ensin ánimu d'arrequecimientu como yera'l casu del Montepío.

La empresa constructora del xeriátricu de Felechosa axudicóse darréu otros proyectos encargaos pola mutualidá minera en Salamanca, Murcia y Almería por importe de daqué más de 4,2 millones d'euros.

Según se punxo de manifiestu na comisión d'investigación constituyida nel Parllamentu asturianu del orixe de la fortuna de Fernández Villa, la empresa Alcedo de los Caballeros tenía en 2008 una plantiya media de 4,4 trabajadores y un patrimoniu netu negativu de 6.006 euros.

Según los datos del Rexistru Mercantil facilitaos nesa comisión, esta empresa algamó beneficios de 9,1 millones d'euros ente 2009 y 2011, un añu enantes de que Fernández Villa y Postigo regularizaren los sos fondos cola Facienda pública.

Fernández Villa, con una situación que queda a la espera de conocese'l resultáu del esame forense, llegó esta mañana a los xulgaos en taxi y necesitó del sofitu de los sos acompañantes pa caminar hasta la puerta del Palaciu de Xusticia.

N'otra causa por apropiación indebida tres la querella interpuesta pol SOMA-UXT, pa la que yá se decretó l'apertura de xuiciu oral, la so abogada presentó numberosos recursos pa evitar la so declaración énte la xuez, daqué que finalmente tuvo que facer el pasáu marzu, catorce meses dempués de ser citáu per primer vegada.

Naquella ocasión, un neurólogu designáu pol xulgáu pa facer l'exame del estáu mental del ex-cabezaleru sindical ratificó que taba en condiciones de sometese a un interrogatoriu, anque con entrugues curties y con descansos.

Fernández Villa enfréntase nesta otra causa a un pidimientu de la Fiscalía de cinco años de cárcel pola presunta apropiación de 434.158 euros del sindicatu.