Llimpieza del Cai Deportivu de Xixón y del Seya nel Día Mundial del Mediu Ambiente

Los integrantes del Club de Piragües llimpien les veres del Seya

La campaña de llimpieza del fondu marín nel cai deportivu xixonés, que se vien faciendo dende l'añu 2015 y que cuntó cola participación de más d'una ventena de buzos, consiguió sacar basura de toa triba. Dende cristal y fierro hasta oxetos singulares como un patinete eléctricu. Pendiente del pesu final de la cantidá recoyida, los sos responsables valoren que ye paecida a la d'otros años.

De los tres contenedores previstos pa la retirada de basura, cuasi dos enllenáronse solo de cristal, una cantidá que, a falta de cifres oficiales, creen asemeyada a la d'otros años.

Esti material foi'l más abondoso na recoyida xunto col plásticu pero tamién s'atoparon oxetos más singulares.

A pesar de la gran cantidá de borrafes, no fondero entá quedaron dellos oxetos como bolardos, mui pesaos pa sacalos. La campaña, qu'empezó va seis años, tien por oxetivu evitar qu'esta acumuladura vaya a más pero tamién que toos tomemos conciencia.

Estes borrafes van tar espuestes na rambla del cai deportivu los próximos díes.

Los integrantes del Club de Piragües llimpien les veres del Seya

Xuntando deporte y conciencia medioambiental. Asina celebraron el Día Internacional del Mediu Ambiente los integrantes del club Piragües El Seya. Llimpiaron el ríu que da nome a la so entidá nel so tramu más baxu a partir de la ponte Torañu con paraes en puntos como La Uña.

La iniciativa ta dientro de les Xornaes de Llimpieza Voluntaria de Coxersa, nes qu'esti club yá participó n'otres ocasiones. Axuntó a cuasi 50 persones, ente palistes y familiares. Pero la ocasión merezlo.

A palaes lleven hasta 100 quilos de basura del Seya estos piragüistes que'l 25 de xunetu próximu van llimpiar el Camín de Santiago al so pasu per Ribeseya.​