Llograr la oficialidá del eonaviego nes mesmes condiciones que l'asturianu

El colectivu 'Agayo Eonaviego' refuga'l términu gallego-asturiano

Llograr la oficialidá del eonaviego nes mesmes condiciones que l'asturianu. Ye la razón de ser de 'Agayo Eonaviego', colectivu de creación recién nel occidente d'Asturies. Integráu por 15 muyeres y homes con una llarga trayectoria na defensa y promoción de la so llingua que dan esti pasu, aseguren, por nun vese representaos por nenguna de les propuestes vixentes na contorna.

Escritores, músicos o docentes de reconocíu prestixu ponen cara a esti colectivu con un oxetu primordial que pasa por llograr la mesma reconocencia pal eonaviego al respective del asturianu, en casu de llograr una futura oficialidá.

Nesta llinia refuguen dafechu'l términu gallego-asturiano pa referise a la so llingua apostando pol d'eonaviego. Definición que la igualaría, señalen, al restu de llingües.

Una futura oficialidá que tendría que reconocer la normativa ortográfica ellaborada en 1993, oficializada pola Academia de la Llingua en 2007 y consensuada polos falantes del eonaviego. Too ello ayudaría a evitar les inxerencies que dacuando lleguen, espliquen, dende Galicia.

Establecer contactos coles fuerces polítiques pal desbloquéu de l'actual situación y promover, en casu contrariu, un mayor desenvolvimientu de la llei d'usu y promoción, son dos de les primeres llinies d'actuación d'un colectivu abiertu a nuevos miembros.