Los bartolos, dulces d'almendra y hoxaldre típicos de Llaviana

La receta orixinaria pasó de xeneración en xeneración y de confitería a confitería

Cunten en Llaviana que siempres fueron 'llambiones' y de munchu gustu pol dulce. Una faceta que tien el so reflexu nos bartolos, pastel esencial del conceyu y unu de los más antiguos d'Asturies.

La receta orixinaria pasó de xeneración en xeneración y de confitería a confitería. Lo primero que necesita un bartolu ye la so base d'hoxaldre. Tres facela, cinco minutos de reposu pa pasar a echar el rellenu d'almendra a temperatura ambiente.

Asitiaríase la tira d'hoxaldre de la demasía nuna posición tresversal como elementu decorativu. D'ehí, al fornu a 215 graos.

Los bartolos son protagonistes de les cristaleres de les confiteríes de Llaviana, pero tamién de delles allugaes na cuenca del Nalón y zones centrales d'Asturies. La fama d'esti dulce foi espardiéndose y, la so demanda y presencia en cites gastronómiques locales dan cuenta d'ello.

Más d'un sieglu poniendo'l toque dulce a xuntes familiares, d'amigos o ocasiones especiales, y demostrando que quien prueba los bartolos de Llaviana, repite.