Los condenados pol Casu Renedo tendrán qu’entrar en prisión el 7 d’ochobre

L’Audiencia Provincial d’Uviéu ordenó la execución de la sentencia

L’Audiencia Provincial d’Uviéu ordenó la execución de la sentencia del Casu Renedo y la entrada en prisión de los principales condenaos el llunes viniente, 7 d’ochobre.

Según l’autu comunicáu a les partes tendrán qu’entrar en prisión la ex-funcionaria Marta Renedo Avilés, l’ex-conseyeru socialista d’Educación José Luis Iglesias Riopedre, la ex-directora xeneral d’esti departamentu, María Jesús Otero, y los empresarios Víctor Manuel Muñiz, propietariu d’Igrafo, y Alfonso Carlos Sánchez, dueñu d’Almacenes Pumarín, toos ellos con penes penriba de los dos años.

En concreto, les penes firmes ascienden a nueve años de cárcel pa Renedo; cinco años pal ex-conseyeru; cinco años y cinco meses pa la ex-directora xeneral; cinco años y dos meses pa Víctor Manuel Muñiz, y dos años y ocho meses p’Alfonso Carlos Sánchez.

La execución de sentencia produzse dempués del últimu fallu del Tribunal Supremu que rebaxó les penes impuestes pola Audiencia Provincial a los principales acusaos, menos la ex-funcionaria Renedo, pa la que caltuvo los nueve años de prisión.

La Sala de lo Penal del Supremu consideró acreditáu que nesti casu, la principal causa de corrupción investigada n’Asturies hasta la fecha, el procedimientu d’axudicación de contratos de suministro y d’obres en cuatro conseyeríes del Principáu "quedó corrompíu".