Los dos trabayadores de Vesuvius abandonen el so encierru na Catedral tres 10 díes

Los emplegaos salen tres la convocatoria oficial de la mesa técnica d'industrialización

Dos trabayadores de la empresa siderúrxica Vesuvius abandonaron esti sábadu'l so encierru na Catedral d'Uviéu, que duró 10 díes, tres la convocatoria oficial pal próximu día 30 d'ochobre de la mesa técnica que va abordar el futuru de la plantiya.

Ente llárimes y abrazos de los sos familiares y cola so mochiles y esterilles pa dormir al costazu, los trabayadores, acompañaos por representantes del Comité d'Empresa, cruzaron la puerta de la ilesia sol son de "Vientos del Norte", un cantar compuestu polos hermanos Agüeros.

Tres cruzar la valla del recintu eclesiásticu, los dos trabayadores, que nun quixeron facer declaraciones, fueron vitoreaos por más de 200 persones que, pese a la fuerte lluvia, fixéron-yos un pasillu d'honor acompañaos del "Asturies" de Víctor Manuel.

Los trabayadores, que nun principiu yeren tres y qu'entamaron una fuelga de fame que desconvocaron hores dempués tres algamase l'alcuerdu, durmieron nel despachu del deán catedraliciu ensin más contactu col esterior que les visites que recibíen del Comité d'Empresa o'l calor de les amueses de sofitu que recibíen nes concentraciones al traviés de les rexes de la estancia.

El comité d'empresa de les plantes de Vesuvius en Llangréu y Miranda de Ebro y la dirección de la compañía algamaron un alcuerdu'l pasáu día 15 pal cese de l'actividá industrial y la execución del ERE'l 31 d'ochobre, anque col compromisu de buscar un plan de reindustrialización con futures recolocaciones.

La multinacional británica dedicada a la fabricación de material refractario presentó un ERE que va suponer el cese d'actividá na so planta llangreana y el despidu de la mayor parte de los sos 111 trabayadores, lo mesmo que de los 17 de la planta de Miranda de Ebro.

Los dos operarios fueron saludaos el pasáu xueves mientres taben zarraos polos reis d'España, la princesa d'Asturies y la infanta Sofía, que paraon unos minutos con ellos na visita que ficieron a la catedral d'Uviéu na primer xornada de la so estancia nel Principáu.