Los ganaderos saluden el fin de los acotamientos

Ponen el focu nuna mala xestión y reclamen quemes controlaes

Esta mesma selmana entró en valir la resolución de la conseyería de Mediu Rural y Recursos Naturales que dexa ensin efectu los acotamientos al pastoréu vixentes n'Asturies por causa de les quemes.

La midida dexa recuperar pa l'actividá ganadera unes 15.000 hectárees en tola rexón.
Nel Oriente asturianu, onde había estayes acutaes nuna quincena de conceyos, dellos de los ganaderos afectaos saluden el fin de los acotamientos.

Ye'l casu de Rubén, un mozu pastor d'Onís, que cuando les sos oveyes nun tán nos puertos altos, pastien peles cuestes de la Sierra d'Ibéu acutaes al pastoréu tres les quemes d'avientu de 2015.

Nel conceyu d'Onís namás na zona d'Ibéu, la qu'utiliza'l ganáu de Rubén y el d'otros vecinos, hasta estos díes l'acotamientu afectaba a unes 200 hectárees y los trestornos yeren mui grandes.

Más allá de saludar el fin de los acotamientos los ganaderos ponen el focu no que consideren una mala xestión de los montes públicos y reclamen quemes controlaes pa evitar quemes mayores.

A partir d'agora, como recueye'l cambéu de la llei de montes, los acotamientos de montes n'Asturies van aplicase a aquelles zones quemaes con arboláu y aprovechamientu madereru.