Los médicos alvierten a Barbón de la falta de recursos n'Atención Primaria

Llamenten les declaraciones de Barbón sobre la necesidá de que l'Atención Primaria vaya volviendo a la normalidá

Los colectivos médicos llamenten les "desafortunaes" declaraciones del presidente del Principáu, Adrián Barbón, sobre la necesidá de que l'Atención Primaria vaya volviendo a la normalidá, al sorrayar que ye un área que sufre dende va años "un deterioru" pol "insuficiente financiamientu" y la "falta de recursos".

La Sociedá Española de Medicina de Familia y Comunitaria, al traviés del so voceru n'Asturies, considera que señalando asina a los médicos de cabecera distrái l'atención sobre otros aspeutos, como les llistes d'espera. Méntase una anulación progresiva d'intervenciones de catatates o ciruxíes de cadril.

Dende los colectivos médicos alvierten de que si se pide n'Atención Primaria una consulta pa traumatoloxía, ye posible qu'hasta finales de 2022 naide vea a quien necesita esa consulta. La Sociedá Española de Medicina de Familia y Comunitaria considera que n'Asturies atiéndense un 25% más consultes nos centros de salú qu'enantes de la pandemia, con dos tercios de la plantiya qu'había.

La Sociedá Española de Medicina de Familia y Comunitaria considera que'l presidente del Principáu desconoz lo que pasa nos centros de salú mientres les sales d'espera tán llenes.

El Colexu de Médicos d'Asturies considera que'l verdaderu problema ye una deficiente organización de l'Atención Primaria, una mala planificación y la necesidá de medrar recursos.

La xerente del Sespa, Concepción Saavedra, reconoció qu'hai problemes pa l'Atención Primaria en quince centros. Concepción Saavedra esplicó que se tán contratando más alministrativos pa iguar esti problema.