Los opositores a maestru recuerden a David Carragal momentos enantes del esame

Más de 5.000 candidatos opten a les 781 places convocaes en siete especialidaes

Les oposiciones al cuerpu de Maestros tuvieron marcaes pola muerte del mozu David Carragal, afrelláu la selmana pasada nel barriu uvieín de La Florida. El maestru pixuetu que morrió de resultes d'una agresión nel barriu de La Florida tenía pensao presentase al esame d'Educación Física.

Na sede onde se celebraba esa prueba, la Facultá de Xeoloxía, el presidente del tribunal tuvo unes palabres d'homenaxe a la so persona enantes de dirixise a tolos opositores pa esplica-yos les normes del esame. Un momentu de murnia compartíu por tolos asistentes ente los que tuvo mui presente l'alcordanza d'un compañeru.

A les 18:00 va haber una concentración na alcordanza de Carragal na Plaza La Escandalera d'Uviéu.

Más de 5.000 maestros esamínense pa les oposiciones n'Asturies

Un total de 5.071 maestros esamináronse pa optar a una de les 781 places ufiertaes en siete especialidaes, lo que representa'l 81,5% de los inscritos.

Les pruebes celebráronse con total normalidá, salvo una incidencia marcada por una aspirante que nun pudo presentase a los esames al dar a lluz, anque, tal como prevé'l resolvimientu de la convocatoria, dáse-y por xustificada l'ausencia y va facése-y otru día, según confirmó a EFE la Conseyería d'Educación.