Los reis presiden el desfile del Día de les Fuerces Armaes énte miles d'uvieínos

Desfile militar con 121 vehículos, 3.145 militares a pie y otros 105 a caballu

Miles d’asturianos asistieron esti vienres y esti sábadu a los actos conmemorativos del Día de les Fuerces Armaes, celebraos en Xixón y Uviéu cola participación d’unos 6.000 militares y presidíos pol Rei, acompañáu na capital uvieína pola reina Letizia.

Dempués de que’l vienres Felipe VI asistiere en Xixón a una revista naval, esti sábadu Uviéu acoyó l’actu central d’esta conmemoración, que se zarró con un desfile peles cais de la capital asturiana que foi presenciáu, nun día soleyeru y de calor, por miles de persones.

Al desfile de los tres exércitos, de la Llexón y de la Guardia Civil nun foi la princesa d’Asturies porque ta de maniobres dientro de la so formación na Academia Xeneral de Zaragoza.

Enantes d’entamar l’actu y mientres s’esperaba la llegada de los Reis, un grupu de persones asitiáu mui cerca de les grades de les autoridaes abucheó a la ministra de Defensa, Margarita Robles, y glayaron "fuera, fuera".

Daqué enantes de les doce del mediudía llegaron Felipe VI y la reina Letizia, a los qu’acompañaron a la tribuna Robles, el xefe del Estáu Mayor de la Defensa, l’almirante xeneral Teodoro Esteban López Calderón; el presidente del Principáu, Adrián Barbón; y l’alcalde d’Uviéu, Alberto Canteli.

Ellí yá taba’l ministru del Interior, Fernando Grande-Marlaska, xunto con otres autoridaes. Tamién asistió al desfile dende la tribuna d’invitaos el presidente de la Comisión de Defensa del Congresu, Alberto Fabra.

Escoltaos pola Unidá de Caballería de la Guardia Real, los reis llegaron en coche a l’avenida de los Hermanos Menéndez Pidal, per onde trescurrió la mayor parte del desfile, y escucharon l’himnu nacional acompañáu d’una salva de 21 cañonazos.

Dempués del llevantamientu de la bandera, los reis presenciaron el saltu paracaidista de dos miembros de la patrulla acrobática del Exércitu del Aire.

Dempués de los saltos, la patrulla Águila, con siete aeronaves, fizo una pasada y dibuxó la bandera española nel aire. Otra pasada zarró l’actu mientres la Guardia Real a caballu desfilaba.

Un homenaxe a los cayíos, nel que’l rei, con uniforme de capitán xeneral del Exércitu del Aire, depositó una rama de lloréu, dio pasu al desfile de les diferentes unidaes de vehículos acorazaos y motos.

Como ye vezu, les unidaes más aplaudíes fueron la Unidá Militar d’Emerxencies y la Llexón, qu’esta vegada llevó pal desfile a la mascota 'Baraka', un borregu machu de dos años.

En total participaron 121 vehículos, 13 d’ellos acorazaos-mecanizaos, y 36 motos. En cuantes al personal, desfilaron 3.145 militares a pie y otros 105 a caballu, nun percorríu estimáu d’un kilómetru.