Los reis y les sos fíes feliciten la Navidá dende Asiegu

La postal retrata a la familia real nel Pueblu Exemplar 2019

Los reis y les sos fíes feliciten la Navidá con una imaxe na qu'apaecen los cuatro nel balcón d'una casa típica d'Asiegu, el llugar que visitaron el pasáu 19 d'ochobre al ser escoyíu'l Pueblu Exemplar asturianu de 2019.

Felipe VI, la reina Letizia, la princesa Leonor y la Infanta Sofía fueron a Asiegu, nel conceyu de Cabrales, el día dempués de la entrega n'Uviéu de los premios Princesa d'Asturies p'afayar la placa na que se constata qu'esi llugar fuera escoyíu como pueblu exemplar del añu.

Esta postal navidiega pue vese dende esti vienres na web de la Casa del Rei.

Na imaxe vese a los cuatro miembros de la Familia real sorrir, toos ellos con gabardina pa faer frente al agua d'esa xornada, nun balcón de madera d'una casa del llugar.

Xunto la semeya, la felicitación navidiega lleva impresa la frase "Feliz Navidá y Prósperu Añu Nuevu 2020" y escrita tamién n'inglés: "Merry Christmas and Happy New Year 2020".

Darréu, figura manuscrita pol rei otra frase, "Con gran ciñu y los nuesos meyores deseos", y debaxo la firma de Felipe VI, la reina y les sos fíes.

Como ye vezu, tamién feliciten la Navidá cola so propia tarxeta los reis Juan Carlos y Sofía, que, como'l pasáu añu, optaron por una imaxe na qu'apaecen xuntos.

La fotografía foi tomada'l pasáu 13 de xunetu nel Real Club Náuticu de Sanxenxo (Pontevedra), cuando don Juan Carlos y doña Sofía cenaron cabo la so fía, la infanta Elena, y otros participantes nes regates.

El rei Juan Carlos, que dos meses dempués pasaría pel quirófanu pa operase del corazón, apaez con americana azul sofitáu nel so cayáu, mientres que doña Sofía, sorriente, ta al so llau con un vistíu estampáu de margarites.

"Felices Pascues y añu nuevu 2020", ye'l mensaxe, igual al d'otros años, qu'apaez enriba de les firmes de dambos per detrás de la tarxeta.

La madre de Felipe VI mandó otra felicitación como presidenta d'honor de la Fundación Reina Sofía, con una imaxe de "L'adoración de los Reis Magos", obra del pintor flamencu Hans Memling, que s'amuesa nel Muséu del Prado, qu'anguaño cumplió'l so bicentenariu.