Los responsables de los supermercaos asturianos garanticen el suministru

Asetra pide un protocolu pa tresportar el material en condiciones segures

Responsables de los grandes supermercaos asturianos faen un llamamientu al aselu. Aseguren que nun hai desabastecimientu, los centros loxísticos funcionen con normalidá y hai de too.

Imáxenes de desabastecimientu que percuerren les redes sociales, débense, aseguren a momentos puntuales del día y en determinaes tiendes, pero que siempres se reponen.

Llama l'atención que lo primero que se ta escosando ye'l papel hixénico.

Por casu, nes carniceríes del mercáu d'El Fontán nun falta nengún productu, aseguren. Solo tán camudando los vezos.

Tamién normalidá nes pescaderíes y fruteríes, onde hai de too.

Encamienten eso sí, que les compres nun seyan compulsives.

Dende la Unión de Consumidores (UCE) pídese racionalidá a la ciudadanía y que nun merquen compulsivamente productos que, en munchos casos, van acabar tirando.

Asetra pide un protocolu pa tresportar el material en condiciones segures

El presidente de la Confederación Española de Tresporte de Mercancíes (CETM), Ovidio de la Roza, aseguró esti vienres que "nun va haber desabastecimientu" de productos básicos nos supermercaos pol aumentu de la demanda pola pandemia del coronavirus.

El tamién presidente de l'Asociación d'Empresarios de Tresporte, Loxística, Aparcamientos y Actividaes Allegaes d'Asturies (Asetra) recordó que nun hai zarros fronterizos pa tresporte de mercancíes, polo que'l suministru de productos básicos ta garantizáu.

Sicasí, consideró que dende l'Executivu central tien que treslladase un protocolu con unes indicaciones básiques que garantice'l suministru en condiciones segures en tolos territorios.

Por esti motivu, CETM unvió una carta al ministru de Tresportes, José Luis Ábalos, na que-y tresmite la so esmolición pol biltu de coronavirus y na que-y pide la creación d'un gabinete de crisis que sirva de contactu coles organizaciones del sector pa poder tener información real y veraz sobro la situación en cada momentu y p'analizar les midíes a llevar alantre.