Los sindicatos convoquen "la marcha del aluminiu" escontra'l zarru d'Alcoa

Un percorríu que va tener 12 etapes pa esixir una solución al Gobiernu d'España

Los sindicatos CCOO, UXT y USO convocaron pal próximu 13 de xunu lo que nomaron "la marcha del aluminiu" a Madrid, un percorríu que va constar de 12 etapes pa esixir una solución al Gobiernu d'España de cara a evitar el zarru de la fábrica d'Alcoa d'Avilés.

Representantes de les tres centrales presentaron esti miércoles esta gran movilización que va tener una duración de 12 díes hasta la so llegada a la capital y va incluyir diverses concentraciones en dalgunos de los destinos polos que va pasar.

El presidente del comité d'empresa de la factoría avilesina, José Manuel Gómez de la Uz, fixo un llamamientu al sofitu de la ciudadanía a esta llucha al entender que la cuenta atrás pal zarru de la fábrica yá ta en marcha, yá qu'acaba'l 30 de xunu.

"Y yá ye'l momentu de qu'haya enriba la mesa una solución factible y vidable pa esti conflictu", manifestó.