Los sindicatos critiquen, por escasa, la ufierta de places interines educatives

Aseguren qu'un terciu de les 2.700 places provisionales son medies xornaes

Los sindicatos afeen qu'Educación nun saque toles vacantes d'interinos y denuncien la medría de la precariedá.

Suatea, ANPE y les federaciones d'Educación de Comisiones Obreres y UXT aseguren qu'un terciu de les 2.700 places provisionales son medies xornaes, el 33%, cinco puntos más que l'añu pasáu.

Tolos sindicatos educativos criticaron esta medría de la precariedá del profesoráu y piden sentase a negociar pa frenar la sangría de los recortes.

Comisiones Obreres puntualiza que de cada 10 profesores tres son interinos, y un terciu d'estos trabayará namái media xornada. ANPE critica que'l llistáu seya provisional y incompletu. Toos echen en falta docentes de los centros d'adultos, escueles oficiales y ciclos de FP, poro, piden una llista de vacantes única y definitiva.

Los sindicatos alvierten qu'a mediaos de setiembre saldrá una segunda tanda de places. Estimen que sedrán mediu millar de vacantes, ente xubilaciones y sustituciones, más goloses. Poro, pa Suatea ye imprescindible qu'esista la figura de meyora de puestu.

Per primera vegada los profesores interinos tienen un mes pa pidir plaza, sicasí güei'l servidor volvió a colapsase. Dos díes enantes del entamu'l cursu, sabrán el so destín.