Los trabayadores d'Alcoa Avilés esixen decidir el futuru comprador de la planta

Estudien si anular o retardar la llamada "marcha del aluminiu" a Madrid

Los trabayadores d'Alcoa alcordaron esixir al Gobiernu central tener la última palabra na decisión de quién se va facer cola planta asturiana, tres recibir dos ufiertes venceyantes.

Sostienen que tienen que ser ellos, que conocen la realidá de la factoría asturiana y yá que ta en xuegu'l so trabayu, decidir cuála ye la meyor ufierta pa ellos. Llamenten que finalmente solo seyan dos les empreses interesaes n'Alcoa y non delles, como dixo l'executivu central nun primer momentu.

Quieren amás que les dos ufiertes aseguren non solo l'empléu d'Avilés sinón un proyectu seriu y a llargu plazu.

Per otru llau y tres l'asamblea celebrada ayeri, hasta última hora de la nueche na planta, los trabayadores estudien si anular o retardar la llamada marcha del aluminiu a Madrid prevista pa esta selmana.

L'alcaldesa d'Avilés en funciones, Mariví Monteserín, dixo esti sábadu que les dos ufiertes venceyantes presentaes pa mercar les plantes de l'aluminera Alcoa n'Avilés y A Coruña "tienen posibilidaes" y espresó'l so deséu de que se conviertan en realidá.

La rexidora local declaró que, más allá de les últimes noticies, solo va tar tranquila cuando puea quitar les grandes pancartes que cuelguen de la fachada principal del Conceyu cola frase "Alcoa nun se cierra".