Los trabayadores de Danone roblen el so despidu

La empresa garantiza los tresllaos a otres plantes y reserva puestu nuna posible empresa compradora

El comité d’empresa de la factoría que Danone tien en Salas, que da trabayu a 69 trabayadores, robló esti vienres l’alcuerdu de despidu colectivu, dempués de ser afitáu por amplia mayoría na asamblea de trabayadores celebrada ayeri, según fontes sindicales.

A la espera de que fructifiquen les xestiones pa la venta de la fábrica a un comprador que garantice la continuidá de l’actividá industrial, empresa y trabayadores acordaron una indemnización de 45 díes per añu trabayáu hasta 2012, con un tope de 42 mensualidaes, y de 33 díes dende esa fecha, con un máximu de 24 pagues.

Al empar, afita prexubilaciones pa los trabayadores que cunten con más de 55 años al acabar avientu del añu qu’entra, con un plan de rentes que garantiza un porcentaxe de salariu netu hasta edá ordinaria de xubilación y el mesmu porcentaxe de base reguladora dende esa fecha, que va en función de la so bolsa indemnizatoria.