Los trabayadores de la ITV allargarán la fuelga que se traduz yá n'esperes de tres meses

Concentración de los trabayadores n'Uviéu

Güei, mañana y pasáu sedrán les tres últimes xornaes de fuelga d’esta convocatoria, pero énte la falta d’avances na negociación cola alministración autonómica, los trabayadores piensen facer una nueva y de más llarga duración pa los primeros meses del añu viniente, según señaló’l voceru de la sección sindical de CCOO d’Industria, Marcos Llorente.

Dempués de participar nes dos concentraciones que protagonizaron güei delles decenes de trabayadores de la ITV en La Plaza España y frente a la Dirección Xeneral de Función Pública, n’Uviéu, el voceru sindical alvirtió que per cada selmana más de fuelga, medra la llista d’espera pa pasar la inspección al rodiu d’un mes.

Enagora, según los datos que manexen los sindicatos, les cites pa pasar la ITV tán dándose pal mes de marzu, pero la espera sedrá cada vegada mayor si nun hai alcuerdu y vase a una segunda convocatoria de fuelga.