Los trabayadores d’Alcoa garren fuerza dempués de la histórica manifestación

Eurodiputaos d’IX y Podemos apuesten por nacionalizar Alcoa si nun s’alcuentra comprador

El comité d’empresa d’Alcoa n’Avilés insiste al Gobiernu d’España a qu’aconceye darréu cola alta dirección d’Alcoa. Consideren que ye la negociación más importante que tien que facer l’Executivu enagora y non la xunta que se celebró ayeri colos presidentes autonómicos en Madrid.

A pesar d’esta situación, güei los ánimos ente los trabayadores tán altos dempués de la manifestación d’Avilés. La gran rempuesta ciudadana, que dexó pequeñes les cais d’Avilés, aseguren que-yos dio fuerces pa siguir lluchando.

Foi una marcha histórica que los trabayadores esperen que sirva pa da-y vuelta a esta situación.

El Gobiernu camudará sustancialmente la tarifa eléctrica cola fin de qu’aporte estabilidá. El secretariu d’Estáu de Mediu Ambiente, Hugo Morán, aseguró que tará llistu esti mesmu añu.

Eurodiputaos d’IX y Podemos apuesten por nacionalizar Alcoa si nun s’alcuentra comprador

Eurodiputaos d’Izquierda Xunida y Podemos apostaron güei por nacionalizar Alcoa si nun s’alcuentra comprador.

Tania González y Ángela Vallina visitaron güei a los trabayadores xunto al eurodiputáu del PSOE Édouard Martin, que ve futuru n’Alcoa.

La resaca de la movilización na cai en defensa d’Alcoa llegó tamién al parllamentu asturianu aconceyáu en plenu esta mañana.