Los trabayadores d’Expal dan anuncia de dos díes de fuelga y movilizaciones

Expal reafírmase nel despidu colectivu y el cese de l’actividá en Trubia

El fabricante de munición Expal reafirmóse esti xueves énte los sindicatos na so intención d’executar un despidu colectivu pa los 52 trabayadores de les sos instalaciones de Trubia, asina como’l cese de l’actividá por causes organizatives y productives.

La dirección de la compañía caltuvo esti xueves na sede del Serviciu Asturianu de Solución Estraxudicial de Conflictos (Sasec) la primer xunta col Comité d’Empresa pa negociar l’espediente de regulación de empléu (ERE), al que los representantes sindicales s’oponen de manera frontal.

De fechu, dempués d’esta primer xunta’l Comité d’Empresa decidió convocar dos díes de fuelga pa los llunes y martes vinientes, 3 y 4 de febreru, informó’l presidente del órganu de representación sindical, Javier Rodríguez.