Los vecinos del pobláu d'Endasa siguen pagando'l so alquiler a Alcoa

Lleven más de dos años ensin mantenimientu nes sos cases, xardinos y accesos

Los vecinos del pobláu d’Endasa, en Gozón, siguen pagando’l so alquiler a Alcoa a pesar de que Windar yá se fizo colos tarrenes de l’aluminera.

Los vecinos tán cansaos de la incertidume. Dempués de la marcha d’Alcoa, dicen que’l pobláu navega a la deriva. Siguen pagando los sos alquileres na cuenta de la empresa yá desapaecida.

Acusen a les alministraciones de tenelos abandonaos, ensin da-yos nengún tipu d’esplicación de lo que pasó y lo que va pasar con ellos, esplica Remedios García Bermúdez, vecina d’Endasa y Presidenta de l’Asociación d’Ames de Casa de Samalandrán

Nucleu de población que medró sofitáu pola antigua Cristalería, anguaño’l pobláu fórmenlu, na so mayoría, vecinos de más de 70 años, esplica Esperanza Botana, vecina d’Endasa.

Hai cases que tienen goteres, porque lleven dos años ensin nengún tipu de mantenimientu, amás hai bloques vacíos. Confíen en que la venta del pobláu y los tarrenes d’Alcoa a Windar, conlleve la construcción de nueves viviendes y l’esbarrumbe de les estropiaes, señala Francisco Muñiz, vicepresidente de l’Asociación de Vecinos d’Endasa, Llaviana y Zeluán.

Según confirma l’alcalde de Gozón, Jorge Suárez, responsables de Windar entrevistáronse con técnicos del ayuntamientu, pa conocer les llendes territoriales a efectos de pidir llicencies, porque’l 65% del tarrén qu’acaben de comprar pertenez a Gozón, pero les más de les naves tán n’Avilés.

Jorge Suárez afirma que quieren axilizase los trámites pa que Windar puea entamar col so proyectu empresarial y la contratación de personal darréu.