Los xugadores del campu de rugbi d'El Naranco esixen meyores nes instalaciones

Nin el Principáu nin l'Ayuntamientu d'Uviéu quieren asumir la titularidá del equipamientu

Los usuarios del campu del rugbi d’El Naranco, n’Uviéu, piden una solución a la falta de mantenimientu que sufren les instalaciones. Dende’l Real Uviéu Rugbi denuncien que nin Principáu nin Ayuntamientu quieren asumir la titularidá del equipamientu.

Problemes de filtraciones d’agua, fontanería y, sobre manera, un tarrén de xuegu convertíu nuna auténtica llamuerga cuando llueve, ye l’estáu nel que ta’l campu de rugbi d’El Naranco.

Ye una instalación municipal llevantada va más de 25 años en tarrenes del Principáu. Nenguna de les dos alministraciones fízose cargu del so mantenimientu, como asegura Arturo Méndez, presidente del Real Uviéu Rugbi.

La medría del club traduzse en 300 xugadores actuales y equipos masculinos y femeninos en delles categoríes.

L’Ayuntamientu d’Uviéu niega ser el titular del equipamientu. La so intención ye construyir un nuevu campu de yerba artificial, 100% municipal, nuna parcela de La Florida, esplica Concepción Méndez, conceyaala de Cultura del Ayuntamientu d’Uviéu.

Una opción que dende’l club deportivu ven con bonos güeyos. Anque enantes solicitaron una xunta cola dirección xeneral de Deportes del Principáu pa conocer la so postura sobre les actuales instalaciones.