Losa afirma que l'estatutu electrointensivu va aprobase "dure lo que dure la llexislatura"

"Nengún vaivén políticu va alterar el proyectu de reflote d'Alcoa"

La delegada del Gobiernu n'Asturies, Delia Losa, aseguró esti miércoles que'l Ministeriu d'Industria va aprobar "dure lo que dure la llexislatura" el Real Decretu qu'afite l'estatutu pa la industria electrointensiva de manera que "nengún vaivén políticu altere'l proyectu de reflote d'Alcoa".

A entrugues de los periodistes sobre si'l refugu a los presupuestos y un posible adelantu electoral podría afectar a esti estatutu, Losa conseñó que'l Ministeriu quier aprobar "por Real Decretu'l mayor númberu de midíes d'esti estatutu pa que seya útil pa revertir" la situación d'empreses como Alcoa.

Según el presidente del comité d'empresa d'Alcoa, José Manuel Gómez de la Uz, el Ministeriu aseguró a Losa na xunta que caltuvieron n'Uviéu que'l borrador d'esi estatutu "va tar enriba de la mesa a mediaos del mes de marzu".

"Tresmití al comité d'empresa que'l Ministeriu tien una firmeza absoluta na defensa del caltenimientu de la industria d'Alcoa", sorrayó la delegada del Gobiernu n'Asturies.

Según Losa, "toles midíes que dependan puramente del Ministeriu van ser aprobaes por decretu lo enantes posible pa que nenguna circunstancia política puea alterar el procesu".

Más d'un centenar de trabayadores de la planta d'Avilés n'Alcoa concentráronse énte la sede de la Delegación del Gobiernu n'Asturies pa esixir una solución a la situación de la factoría d'Avilés, amenazada de zarru xunto a la d'A Coruña.