L’albergue de Fayacava dexa a los montañeros reponer fuercies

Ceferino agospia a veceros de dellos continentes

Nel nuestru percorríu per Bimenes paramos güei na sierra de Peñamayor. Ellí, na vertiente yerbata ta l’albergue de Fayacava, un espaciu municipal que dexa a los montañeros descansar y reponer fuercies.

Dexando atrás el pueblu de Melendreros, una pista llévanos al albergue de Fayacava. Equí, a cuasi 800 metros d’altitú y embaxo la cresta de Peñamayor, el visitante pue reconocer, si’l tiempu dexa, dende La Peña Mea hasta la costa maliaya, pasando per Les Ubiñes o L’Aramo. Ye la panorámica cola que convive, dende va dos años y mediu, Ceferino Gutiérrez, l’encargáu del albergue municipal yerbatu.

A pesar del so privilexáu asitiamientu, nun somos los asturianos los veceros de davezu del albergue. Ceferino yá tuvo agospiaos a veceros de dellos continentes.

Na búsqueda de nuevos caminos que percorrer, la sienda GR109, que traviesa Asturies pel interior dende Os Ozcos hasta los Valles de Peñamellera, convirtióse nuna ruta cada vegada con más xente. Una de les 28 etapes nes que se divide acaba en Fayacava, onde pue pasase la nueche y comer. Anque per Fayacava cada vegada pasen tamién más ciclistes. El final d’etapa de la Vuelta a España en Les Praeres, a cuatro kilómetros, fizo un efectu llamada ente los cicloturistes.

L’albergue de Fayacava lleva operando, polo menos, dende 1960. Daquella l’encargáu de xestionalu yera l’históricu montañeru de Blimea Alejandro García 'Carrucha'. Cola llegada de la democracia, l’Ayuntamientu de Bimenes llicita cada cinco años la esplotación d’estes instalaciones feches, mirando al oeste, embaxo les crestes de Peñamayor.