Marcelo Palacios, partidariu del derechu a decidir de la xente sobre la so muerte

El Congresu Internacional de Bioética abordará l’usu responsable de les biotecnoloxíes

El presidente de la Sociedá Internacional de Bioética, el xixonés Marcelo Palacios, amosóse güei partidariu del derechu a decidir de la xente sobre la so muerte, siempres que s’afiten unos requisitos de garantía. Díxolo esta mañana, na presentación del Congresu Internacional de Bioética.

El compromisu mundial sobre l’usu racional y responsable de les biotecnoloxíes, sedrá’l tema central del XI Congresu Mundial de Bioética. El recintu ferial de Xixón volverá a ser escenariu d’esta cita que se celebrará del 15 al 17 de xunu d’esti añu.

Esta edición valdrá d’homenaxe a la  científica Margarita Salas. Xixón convertiráse otra vuelta en capital mundial de la bioética gracies a la presencia de 17 ponentes vinientes de tol mundu. Con ellos reflexonaráse sobre cuestiones como les prioridaes nel usu de les biotecnoloxíes, el so venceyu colos Derechos Humanos y les consideraciones étiques qu’arrodien esti campu.

El congresu incluye, nesta undécima edición, un alcuentru d’estudiantes cola fotógrafa submarina Ai Futaki.