Maricusa Argüelles, una vida de llucha por un mundu más xustu pa les muyeres

Na so trayectoria destaca l'ésitu de 'El Tren de la Llibertá'

Maricusa Argüelles siempres quixo ser llibre y por eso, con 18 años, dexó la so Llaviana natal buscando un empléu que la convirtiera nuna muyer independiente y ye que na so casa, les opciones que tenía nun casaben colos sos planes.

A la so vuelta a Llaviana entamó la so aventura activista: primero, nun sindicatu y más tarde, cola creación d'una asociación de muyeres en Los Barreros.

De la so llucha feminista ta arguyosa, sobre manera, d'acompañar a les sos vecines en dos actividaes: denunciar a los sos maltratadores y atayar los sos embaranzos na clandestinidá, cuando l'albuertu taba penáu por llei. Namás una vegada delegó esta xera nel so home.

Xubilóse de l'alministración por convencimientu, pa dexar pasu a les nueves xeneraciones, pero nunca, diz, va dexar la llucha feminista.

Na so trayectoria, destaca l'ésitu de 'El Tren de la Llibertá', una manifestación multitudinaria peles cais de Madrid, qu'axuntó a miles de muyeres pa protestar pola reforma na llei del albuertu que quería llevar alantre l'entós ministru Alberto Ruiz Gallardón.

Asegura sentir mieu de la creciente fuerza de la estrema derecha n'España y nun tolera que se fale del 8M como un focu d'andanciu na recién crisis sanitaria.

Llámenla activista de base y gústa-y. Sobre les bases, diz, pue construyise y eso ye lo que fixo siempres Maricusa, construyir un mundu más xustu pa les muyeres.​