Marqués reivindica pensiones dignes y polítiques pal avieyamientu activu

Barbón valora la "potencia económica" d'España p'asegurar el sistema de pensiones

El presidente del Principáu, Adrián Barbón, destacó esti llunes qu'España "tien potencia económica abonda" como p'asegurar la pervivencia del sistema de pensiones, de la que garantizó que'l Gobiernu rexonal va apostar nos presupuestos de 2025 pa reforzar el nuevu modelu de cuidaos de llarga duración.

Barbón, que fixo estes declaraciones nel actu institucional de la Federación d'Asociaciones de Mayores del Principáu (Fampa) na Feria Internacional de Muestres d'Asturies (Fidma), afitó que'l Principáu va siguir apurriendo fondos pa reforzar la sanidá pública y "suplir la falta de personal".

Tamién conseñó la necesidá d'aumentar la ufierta de vivienda pública, "tamién pa persones mayores", al empar que llamó l'atención sobro la necesidá de "dexar de tratar a los mayores como un colectivu residual" a efectos económicos.

Pela so parte, el presidente de la Fampa, Cesáreo Marqués, adelantó que'l 13 setiembre, nel Marieva Palace va rindíse-y un homenaxe a l'anterior presidenta de la entidá, Dolores San Martín.

Cesáreo Marqués afitó que los mayores son "aliaos clave" nel desenvolvimientu de polítiques diseñaes pal avieyamientu activu, y un colectivu que contribúi al "dinamismu económicu" y al fortalecimientu del "texíu económicu y social".