Más de 3.000 militares participen nel desfile del Día de les Fuerces Armaes

El día empezó con una bona dosis de café, cantaraes y piques de chancia ente unidaes

Uviéu volcóse esti sábadu coles Fuerces Armaes nun desfile de 3.250 militares presidíu polos Reis y miráu por miles de persones qu'acompañen a los tres exércitos y a la Guardia Civil nel so día, que se celebra cada añu dende l'entamu de la democracia.

Xusto enantes del desfile, TPA Noticies acompañó a los más de 3.000 militares pa los que güei foi un día mui especial.

El día empezó pa ellos con bona dosis de café, cantaraes, piques de chancia ente unidaes, música, dacuando poco castrense, pero qu'ayudaba a quitar los nervios, especialmente pa los que güei xugaben en casa, como Alejandro Gil y Hugo Zazo, asturianos na Compañía de Guardies Nuevos.

Hugo Blanco, asturianu nel Terciu de l'Armada, Álvaro Rodríguez, xefe de la primer Bandera de la Lexón, José Luis Calvo, Teniente Coronel del Exércitu del Aire, Carlota Pachón, soldáu de la UME, o David Utrera, del Segundu Batallón del Terciu de l’Armada compartieron les sos impresiones sobro esti día tan especial con TPA Noticies.

Hebo chancies, munches, hasta que llegó'l momentu de pasar revista pa desfilar y firmes, namás s’escuchaba'l son de la trompeta.