Menos animales en reserves y cotos

Los cazadores dicen que ye por mor de la presión del llobu y l'osu y a los incendios forestales

Nes zones altes, los cazadores ven menos fauna cinexética. La Federación Asturiana de Caza diz que ye por mor d’una mayor presión del llobu y del osu, del que tamién son damnificaos los sos perros. Piden que se defina’l númberu d’exemplares d’especies protexíes pa facer compatible’l so caltenimientu cola actividá humana nel mediu rural. Cúntalo Valentín Morán, presidente de la Federación Asturiana de Caza.

Les reserves xestionaes pola alministración menguaron la mayoría de los cupos; a tres exemplares nel casu del xabalí. Esta especie, de la que s’abaten unos 12.000 al añu, desplazóse monte abaxu. El Principáu adelantó 15 díes la temporada de caza mayor, qu’entamó a mediaos d’agostu, p’amenorgar asina los estrozos nos cultivos. Los incendios forestales tamién dexaron marca en dalgunos cotos del occidente, que xestionen ensin cupos y directamente les sociedaes de cazadores. Dalgunos pierden lo que otros ganen.

Les monteríes amuésense conservacionistes col corzu, al menguar a esgaya la so población por mor d’un guxán. Dende va ocho díes, tamién se dexa la caza menor, la de perdices y arcees.