Miguel Ángel López, unu de los cazadores más veteranos del cotu d'Eilao

L'afición pola caza nació-y siendo  un neñu

A Miguel Ángel López l'afición pola caza nació-y siendo  un neñu. Con poco más de 15 años entamó a xubir al monte y güei, a les sos 59 primaveres, diz caltener la ilusión del primer día. Entamó a cazar n'Eilao en 1988, nun requexu onde diz sentise como en casa.

Anguaño ye unu de los dos xefes de la Cuadriella 'El Monte', integrada por cazadores d'Uviéu, Xixón, Tapia, Ribadeo, A Veiga y Eilao. Axúntense cada domingu pa esfrutar de la so afición nel que ye, asegura, unu de los meyores cotos de tol occidente.

Les más de tres décades caminando estos montes valiéron-y p'atropar un bon númberu d'anécdotes. Como por casu, matar cabo los sos compañeros seis xabalinos nuna sola xornada. Too ello, eso sí, dende'l respetu a la redolada y a los animales.

Tou un namoráu de la so afición que-y dexó afayar esti requexu d'Asturies al que nun va abandonar, afirma, mientres les ganes y el cuerpu aguanten.