Miles de persones esixen nel Primeru de Mayu n'Uviéu la xuba de los salarios

Por un repartu más xustu de la riqueza y escontra les privatizaciones

Miles de persones participaron güei n'Uviéu na manifestación conmemorativa del Primeru de mayu, na qu'UXT y CCOO reivindicaron la necesidá de "xubir salarios, baxar precios y repartir beneficios", amás del pidimientu sindical pa desbloquiar les meses de negociación y poder roblar los convenios colectivos pendientes nel segundu semestre.

Manifestación tamién en Xixón. Nesti casu, convocada polos sindicatos CSI, CGT, CNT y Suatea sol lema “El so arriquecimientu, la nuesa probitú". Reivindicaron la dignidá de los trabayadores y condergaron la persecución sindical.

Les organizaciones convocantes punxeron el focu nel empobrecimientu que, al so xuiciu, ta sufriendo la clase obrera. L'aumentu de los precios, la probitú enerxética o los ERE a los que tán sometíos munchos trabayadores asturianos son l'exemplu, afirmen, de la incapacidá de la clase política pa resolver los problemes de los más vulnerables. A ello sumen, aseguren, les privatizaciones y los retayos en servicios públicos como educación o sanidá.

Pela so parte, la candidata de Podemos nes elecciones autonómiques Covadonga Tomé, tuvo nesta manifestación entamada polos sindicatos minoritarios. Tomé naguó por polítiques que resuelvan el desempléu y ampliar los derechos de los obreros.