Miles de persones reivindiquen n'Asturies los derechos de los trabayadores

Los sindicatos marchen baxo'l lema: "Nun hai escuses. A la cai"

Miles de persones, unes 14.000 según los sindicatos UXT y CCOO, manifestáronse güei peles cais d'Avilés por mor de la fiesta del Primeru de Mayu, baxo'l lema de "Nun hai escuses", instando al fin de les polítiques d'austeridá de los gobiernos.

Asina lo consideraron el secretariu xeneral de CCOO d'Asturies, Antonio Pino, que xustificó'l lema de "Nun hai escuses", en que, depués de tres años de medría económica, que básicamente valió pa "alimentar" los beneficios empresariales y del capital y non asina les rentes del trabayu, lo que se pide ye que los salarios medren.

"Tienen que medrar non sólo por xusticia social, que tamién depués de nueve años de precarización del emplegu, sinón porque entendemos que valdrá pa meyorar la economía de los trabayadores y meyorar l'emplegu pa dar puxu al consumu", declaró'l líder rexonal de CCOO.

Na so opinión, "nun hai escuses pa que nun cambie tamién la situación d'anguaño d'inxusticia y inmoralidá cola que'l Gobiernu del PP tien sometíos a los pensionistes, con conxelación de les pensiones y llueu con una revalorización d'un mínimu 0,25 por cientu, col copagu farmacéuticu y la eliminación de más de 400 medicamentos".

"Nun hai escuses pa nun meyorar la protección social de les persones", indicó, y dio'l datu de que namás un 46 por cientu de los paraos n'Asturies tienen una prestación.

Pino señaló que n'Asturies fai falta unidá ente les fuerces polítiques d'izquierdes: "yá ta bien de reñes de gatos que faen que se nos tea pasando'l tren de les infraestructures y nun s'atiendan retos como l'avieyamientu poblacional, les polítiques pa los mozos o la brecha salarial".

Pela so parte, el secretariu xeneral d'UXT n'Asturies, Javier Fernández Lanero, tamién fizo usu del lema de la manifestación pa conseñar que nun hai escuses "pa que tola medría económica nun se reparta equitativamente ente tolos trabayadores".

"Tamos asistiendo a una auténtica corrupción, amás de la política, en materia llaboral, porque fuimos los trabayadores los que pagamos la consecuencia d'una crisis que nun xeneramos, foi'l sistema financieru al que se-y inyectaba dineru público mientres nos baxaben los salarios", denunció Fernández Lanero.

Na so opinión, los trabayadores fueron los que pagaron "la única política que punxo la XE y esti país en marcha, que foi l'austeridá, pa salir de la crisis".

Esa austeridá sufriéronla, na so opinión, les muyeres, con una brecha salarial "insoportable", los pensionistes, los mozos y los desemplegaos ensin prestaciones.

Javier Fernández Lanero tamién pidió unidá nes formaciones polítiques "pa qu'antepongan los sos intereses personales, a los sos egos, a les sos fobies y rensíes, los intereses los asturianos".

La manifestación acabó con una concentración na plaza España y cola participación d'otros dirixentes sindicales, amás de políticos, como l'alcaldesa d'Avilés, Mariví Monteserín, ente otros.

Per otru llau, n'Uviéu, alredor de 2.000 persones manifestáronse nel actu central entamáu pola Unión Sindical Obrera (USO) pa esixir la recuperación d'unos salarios y emplegos dignos y en defensa de los derechos de los trabayadores y de la xusticia social.

El secretariu xeneral de la organización, Julio Salazar, qu'encabezó la marcha reivindicativa, llamó a la "ofensiva pa revertir l'actual situación na que la medría económica, que xubió un 9 por cientu, nun recái realmente nos trabayadores".

"Llevamos tres años de medría económica que nun se tornó nuna xuba de les rentes y de les condiciones de los asalariaos y de les pensiones mientres que les empreses tripliquen los sos beneficios", conseñó Salazar.

En declaraciones a los periodistes enantes d'entamar la marcha, el líder d'USO dixo que "se trata de revertir y facer que la distribución de la riqueza d'una vez por toes se reparta xustamente y nun vaya namás a los cuatro privilexaos de siempre".

Salazar esplicó qu'USO decidió que per primer vez se celebre'l so actu central n'Uviéu, y non en Madrid como pasó siempre, pa "ufiertar un reconocimientu y un agradecimientu a Asturies por tolo que fizo pol movimientu sindical y polos derechos de los trabayadores".

Tres la pancarta baxo'l lema "¡A la ofensiva! Polos salarios, l'emplegu dignu y la xusticia social", alredor de miles de persones veníes de Castiella y Lleón, Galicia, Cantabria y Madrid xuntáronse a los asturianos pa celebrar esta xornada reivindicativa.

La manifestación salió de la plaza de la Constitución pa percorrer les principales cais de la capital del Principáu hasta llegar a la Plaza España, na que ta la sede de la Delegación del Gobiernu n'Asturies, onde Salazar protagonizó un mitin.

El líder pidió "una rexeneración no político y, sobre manera, nel marcu sindical, cola reforma de la normativa electoral sindical y de la Llei Orgánica de Llibertá Sindical".

Salazar conseñó la necesidá d'estos cambeos normativos pa que "se faiga xusticia a toles organizaciones y puean tar representaes nes instituciones".

Amás, en Xixón, más de 2.000 persones participaron na movilización convocada polos sindicatos minoritarios, CSI, CXT, CNT y SUATEA.

Una manifestación qu'entamaba con una intensa fumareda por una barricada de neumáticos na Avenida San Crespo frente a la casa sindical, quemada por dellos manifestantes.

La marcha salía de la plaza L'Humedal baxo'l lema 'Tiempu de llucha. Tiempu de nós. Toma la cai' pa percorrer darréu'l centru la ciudá p'acabar nos xardinos del Náutico.