Miles de persones salen a la cai n’Avilés al gritu de "Alcoa nun se pieslla"

Los manifestantes vindiquen la industria como una de les señes d’identidá d’Asturies

Miles de persones salieron güei a la cai pa "parar los pies a Alcoa" y esixir que dea marcha p’atrás na so decisión de pesllar les fábriques d’Avilés y A Coruña y d’aplicar un espediente de regulación de trabayu que llevaría al paru a los 686 trabayadores que formen dambes plantiyes.

La manifestación, que salió de La Plaza’l Vaticanu d’Avilés, cuntó con una gran representación de los principales partíos políticos y sindicatos, que marchaben detrás d’unes pancartes que se resumen no que se convirtió nun lema d’esta llucha que ta en tolos requexos y establecimientos comerciales de la ciudá: "Alcoa nun se pieslla".

Los manifestantes vindicaron la industria como una de les señes d’identidá d’Asturies y pidieron que se dean los pasos afayadizos pa solucionar toles cuestiones que torguen el futuru de l’actividá empresarial, sobre manera lo que cinca al costu de la enerxía.

Na protesta tuvo ausente l’alcaldesa de la ciudá, Mariví Monteserín, que foi a Madrid a defender les fábriques y los trabayos nuna xunta coles ministres d’Industria, Reyes Maroto, y de Transición Enerxética, Teresa Ribera; los presidentes d’Asturies, Javier Fernández, y de Galicia, Alberto Núñez Feijoo, y l’alcalde d’A Coruña, Xulio Xosé Ferreiro.