Moriyón asegura que dirá a les elecciones autonómiques con un programa propiu

Dexa nel aire una posible coalición

L'alcaldesa de Xixón y candidata a la presidencia de Foro, Carmen Moriyón, dexó nel aire la posibilidá de que'l so partíu vaya en coalición en les próximes elecciones autonómiques, calteniendo qu'habrá “entendimientu con tolos grupos” y defensa d'un “programa propiu de Foro”.

Al ser preguntada en reiteraes ocasiones pola posibilidá de que Foro vaya en coalición col PP, Moriyón caltuvo la so postura de que Foro defenderá'l so propiu programa y que tará abiertu al entendimientu con toles fuerces.

Lo que sí descartó dafechu ye dexar pel momentu les sos funciones como alcaldesa de Xixón.

Moriyón dixo que dio esti pasu nel momentu nel que los proyectos más importantes de Xixón tán “encarrilaos”, como ye'l casu del Plan de Víes.

Amás, conseñó que'l so equipu de Gobiernu encaró dellos problemes nel mes de xunu, como la moción de censura o les manches de la playa de San Llorienzo, y tamién eventos cimeros como la Feria Muestres, polo que nun se pue acusala de dexación de funciones.

Tamién recordó que nun ye la primer persona que compatibiliza los llabores como alcaldesa cola candidatura rexonal, poniendo como exemplu a Vicente Álvarez-Areces.

La candidata a la presidencia de Foro presentó güei'l programa electoral que fizo pa concurrir al Congresu del partíu, y tuvo acompañada de dellos miembros de la formación, ente ellos el secretariu xeneral, Francisco Álvarez Cascos.

Acerca del programa, conseñó que ye “escuetu” pero que “sintetiza bien la idea de Foro y lo que debe representar”, yá que reafirma la so “visión reformista”, el so espíritu “de centru” y la so “vocación europea”.

Un documento qu'afonda na necesidá de “revalorizar los exes de la Constitución” y qu'apuesta polos intereses d'Asturies.

Nél, Foro fai una apuesta pola participación ciudadana, yá que'l programa ta sofitáu en tres exes: “nengún conceyu ensin triar, nenguna mano ensin estrechar y nenguna propuesta ensin respuesta”.

Dende'l so puntu de vista, Asturies lleva munchu tiempu “al ralentí”, alloñándose del crecimientu d'España.

Una situación que se ve reflexada en múltiples indicadores, ente los que resaltó la evolución negativa de la población, el problema de la tasa de la natalidá o la tasa de xera, na qu'Asturies ta allugada nel últimu llugar, 7'9 puntos per debaxo de la media nacional.

Por esti motivu, presentó un programa que supondrá una alternativa al “monólogu ensin interllocutores”, a la “soberbia” y a la “inactividá” que llevó a la rexón a esta situación.

Respecto a los proyectos qu'inclúi, destacó la reclamación d'una financiación autonómica equitativa y una atención inversora que corrixa la delda histórica col Principáu.

Amás, aseguró qu'adoptará les midíes necesaries pa poner fin a la despoblación d'Asturies y pa crear un entornu favoratible a la xera, qu'ayude a medrar a la rexón.

Tamién insistió na importancia de conservar la natura asturiana, sofitar los sectores básicos de la so estructura productiva, d'estimular la investigación y el talentu autóctonu y de reforzar el papel de la muyer na sociedá.

Un proyectu que defenderá los mesmos argumentos n'Asturies y en Madrid, al contrario qu'otros grupos que “toquen un botón n'Asturies, y otru nel Congresu de los Diputaos”, concluyó.