Moriyón da un pasu al frente pa liderar Foro
Anuncia la so candidatura a la presidencia y a entamar la llista de les autonómiques
L'alcaldesa de Xixón, Carmen Moriyón, anunció güei la so candidatura a la presidencia de Foro y, polo tanto, a liderar la llista cola qu'esta formación se presentará a les elecciones autonómiques del mes de mayu.
Acompañada pol secretariu xeneral del partíu, Francisco Álvarez-Cascos, y del actual presidente de Foro, Pedro Leal, ente otros cargos y afiliaos, Moriyón anunció esti pasu a la política rexonal nun hotel de la capital asturiana cabo la sede d'esti partíu.
Moriyón, que ta al frente del consistoriu xixonés dende 2011, nun pue volver optar a l'Alcaldía de la ciudá nes elecciones de 2019 porque los estatutos de Foro impiden a los sos cargos electos tar más d'ocho años nel mesmu puestu.
Delles agrupaciones locales de Foro, como les de Siero, Noreña o Somiedu, yá pidieren a l'alcaldesa de Xixón qu'optara a liderar el partíu, inclusive enantes de que Cristina Coto anunciara la so dimisión como presidenta del partíu por problemes con Álvarez Cascos y los otros dos diputaos de Foro na Xunta Xeneral.
La de Moriyón paez, per agora, la única candidatura qu'optará a liderar el partíu que nos próximos meses llevará alantre un procesu de primaries que culminará cola escoyeta d'una nueva comisión directiva y del candidatu a la Presidencia del Principáu nel III Congresu que la formación rexonalista celebrará nel auditoriu de La Pola (Siero) el 29 de setiembre.