Moriyón formaliza con un millar d'avales la so candidatura a presidir Foro

La presidencia de Foro lleva apareyada la candidatura a la Presidencia del Principáu

Un millar de firmes avalen la candidatura a la Presidencia de Foro de l'alcaldesa de Xixón, Carmen Moriyón, llista que güei presentó na sede del partíu y na que s'inxerta l'actual secretariu xeneral d'esta formación, Francisco Álvarez Cascos.

Na xornada na qu'acaba'l plazu pa la presentación de candidatures a la presidencia de Foro, l'alcaldesa y presidenta d'esta formación en Xixón foi hasta la sede d'Uviéu pa presentar la suya y les 996 firmes de militantes que la avalen.

Sicasí, a esti númberu d'avales podrán sumase entá más a lo llargo'l día, hasta la finalización del plazu previstu pola comisión organizadora del III Congresu de Foro.

La de Moriyón foi la única que pel momentu se presentó na sede de Foro, que tien de plazu hasta'l domingu, día 9, pa proclamar les candidatures.

La presidencia de Foro lleva apareyada, según recueyen los sos estatutos, la candidatura a la Presidencia del Principáu polo que, si como se prevé, la candidatura de Moriyón ye la única que se presenta, l'alcaldesa va liderar la llista cola que'l partíu rexonalista va presentase a les elecciones de mayu de 2019.

Moriyón, que ta al frente del consistoriu xixonés dende 2011 y que nun pue volver optar a l'Alcaldía de la ciudá nes municipales del próximu añu porque los estatutos de Foro torguen a los sos cargos electos tar más d'ocho años nel mesmu puestu, yá anunció'l pasáu 20 de xunetu la so decisión de dar esti pasu a la política rexonal.

El procesu de primaries en Foro va rematar cola elección d'una nueva comisión directiva y del candidatu a la Presidencia del Principáu nel III Congresu que la formación rexonalista va celebrar nel auditoriu de La Pola (Siero) el 29 de setiembre.

Dende'l pasáu 18 de xunu ta al mandu de Foro'l diputáu rexonal Pedro Leal, qu'asumió'l cargu arriendes de que Cristina Coto dimitiera poles discrepancies surdíes tres la so decisión de modificar la situación llaboral d'una trabayadora del grupu parlamentariu escontra de la opinión de los otros dos diputaos del so grupu y de la dirección del partíu.