Necropsia a un calamar xigante atopáu en Llanes

L’oxetivu ye investigar una especie animal mui conocida pero mui poco estudiada

Un equipu de biólogos y técnicos entamaron esta mañana la necropsia a un calamar xigante atopáu n’El Sablón, en Llanes, n’agostu del añu pasáu. Ye un machu, mide cuasi seis metros y pesa 63 kilos. L’oxetivu ye investigar una especie animal mui conocida pero mui poco estudiada.

Los tentáculos superen a esgaya’l tamañu del cuerpu, que nun llega a un metru. Esti, en concreto, nun ye de los más grandes que suelen apaecer n’Asturies, porque dalgunos lleguen a algamar hasta cuasi 20 metros. Lo más curioso ye que seya un machu, cuasi siempre s’atopen femes.

Más que conocer les causes de la muerte, busquen estudiar dafechu l’exemplar, porque ye una especie mui desconocida.

El segundu pasu consiste n’abrir les diferentes partes y muérganos pa buscar información.

L’últimu pasu sedrá metelu nuna urna con alcohol p’amosalu de mou didácticu. L’exemplar sedrá amosáu nel muséu que tien el Centru d’Esperimentación Pesquera.