OTEA recurrirá énte'l TCXA'l pieslle de la hostelería

La patronal pidirá como midida cautelar la reapertura de l'actividá hostelera

El Comité Executivu de la patronal d’hostelería y turismu OTEA acordó esti miércoles recurrir énte’l Tribunal Cimeru de Xusticia d’Asturies (TCXA) les resoluciones aprobaes pol Gobiernu del Principáu qu’afiten el pieslle de la hostelería.

Fontes de la patronal dixeron que se recurrirán les resoluciones de Sanidá del 18 de xineru, qu’ordenaben el pieslle del interior de los locales d’hostelería con calter xeneral, y del 1 de febreru, qu’afitaba tamién el cese de l’actividá en terraces en dalgunos conceyos en situación de riesgu estremu pol empeoramientu de la so situación epidemiolóxica.

Esti pieslle total de la hostelería afecta a los conceyos d’Avilés, Castrillón, Corvera, Ayer y L.lena.

Nel so recursu, OTEA pidirá como midida cautelar la reapertura de l’actividá hostelera, una midida qu’ayeri foi aceptada pol Tribunal Cimeru de Xusticia del País Vascu (TCXPV) a pidimientu de les asociaciones hosteleres vasques.