PP y Vox presenten enmiendes a la totalidá de los presupuestos d'Asturies

Mallada insiste en que'l proyectu del Executivu nun afita midíes qu'ayuden a frenar el declive demográficu d'Asturies

Los grupos parllamentarios de PP y Vox confirmaron esti miércoles que presentarán enmienda de totalidá al proyectu de presupuestos del Principáu pa 2023, unes cuentes a les que tamién solicitarán la so devolución al Gobiernu Ciudadanos y Foro, y que tienen garantizada la so aprobación col sofitu de PSOE, IX y Grupu Mistu.

Asina, el plenu que se celebrará'l vienres viniente na Cámara asturiana debatirá cuatro enmiendes de totalidá que sedrán refugaes colos 21 votos d'eses tres formaciones, a los que s'amestarán los cuatro del grupu parllamentariu de Podemos anque la formación morada someterá a votación ente la so militancia la so postura definitiva de cara al plenu del día 30 cuando les cuentes saldrán alantre tres la votación de les enmiendes parciales.

Pa la portavoz popular, Teresa Mallada, un Gobiernu con un grau d'execución presupuestaria inferior al de los sos predecesores volvió a rexistrar tarde na Xunta Xeneral unes cuentes que, a xuiciu de so, nun ayuden a los asturianos a compensar "el sobresfuerzu fiscal" provocáu pola xubida de la inflación.