Paisaxe, natura y hestoria na 'Sienda de los 20.000 pasos'
![Senda de los 20.000 pasos](https://www.rtpa.es/fotos//21/01/20210122115718_RTPA362054.jpg)
La sienda, de 17 kilómetros, pasa per Uviéu, La Ribera y Morcín
Son 20.000 los pasos que separten la Catedral d'Uviéu de les capiyes del Monsacro, en Morcín, dos llugares onde tuvieron depositaes les reliquies del Arca Santa. Por culpa de que nel sieglu IX, el monarca asturianu Alfonso II El Castu treslladóles dende la capiya de Santiago hasta la Cámara Santa de la Catedral.
Un trayectu que güei se conoz como la 'Sienda de los 20.000 pasos' o 'Ruta de les Reliquies' y qu'empezó a tomar forma en 2016, gracies al interés de la Plataforma d'Amigos del Monsacro.
La sienda, d'unos 17 kilómetros, pasa per Uviéu, La Ribera y Morcín. Dende la Catedral d'Uviéu, el trayectu usa nuna primera parte'l trazáu de la Sienda Verde hasta La Manxoya.
Ellí va pa Güeñu, en La Ribera, per El Cogollu, pasando depués per Ferreros, Les Segaes y Soto Ribera. Yá nel conceyu de Morcín, pasa per Argame y Santolaya, enantes d'entamar un empináu camín d'unos dos kilómetros y mediu hasta la cima del Monsacro.
Una ruta apta tanto pa senderistes como pa ciclistes y que cunta inclusive col so propiu emblema: el cardu.
La Plataforma d'Amigos del Monsacro trabaya los últimos años colos conceyos implicaos en dar promoción al trazáu. Ente los sos oxetivos ta ampliar la señalización de la ruta y meyorar dellos puntos del so percorríu, como l'enllaz cola Sienda Verde na ponte d'El Caleyu, que va implicar facer una pequeña obra. La idea ye entamar pelegrinación añal pela ruta dende la Catedral al Monsacro.
El proyectu cunta cola participación de la Federación de Monte y quier ser un atractivu turísticu más pa los tres conceyos implicaos, xuniendo paisaxe, natura y hestoria.