Penes d'ente 20 y 22 años de cárcel pa los acusaos de matar a Ardines

Les defenses de los acusaos recurrirán la sentencia de l'Audiencia d'Uviéu

L’Audiencia d’Uviéu condenó a penes individuales que van de los 20 a los 22 años de prisión a los cuatro acusaos de matar al conceyal d’IX de Llanes Javier Ardines, que foi asesináu nun camín vecinal asitiáu a pocos metros de so casa na parroquia llanisca de Belmonte (Pría) a primer hora de la mañana del 16 d’agostu de 2018.

El presuntu inductor, Pedro N.A, que planificare’l crime dempués de conocer que la so muyer y el conceyal teníen una rellación, foi condenáu a 22 años de prisión, al igual que los dos ciudadanos arxelinos acusaos d’executar el crime por dineru, Djilali B. y Maamar K. A Jesús M. impúnxose-y una pena de 20 años como cooperador necesariu al que se-y atribuye’l papel d'intermediariu.

Los cuatro acusaos, que fueron declaraos culpables por unanimidá por un xuráu popular dempués d’un xuiciu que s’allargó 18 sesiones, tendrán qu’indemnizar amás a la viuda y los dos fíos d’Ardines con 400.000 euros de forma conxunta y solidaria.