Podemos pide a Barbón axuntase pa qu'esclarie si va sofitase nun sociu de Vox como Foro

IX reprocha a Tomé que nun esclariara la so posición de cara a la investidura

La izquierda va dixebrada a les negociaciones col PSOE. IX reprocha a Covadonga Tomé qu'entá nun esclariara la so posición énte la investidura. Tomé afita que'l so votu nun va ser gratis. La división estiéndese tamién al interior de Podemos, con disensiones ente Tomé y la dirección.

La diputada electa de Podemos nel parlamentu asturianu, Covadonga Tomé, esixó esti xueves al presidente y candidatu a la reelección, el socialista Adrián Barbón, a convocala yá pa negociar tanto la composición de la Mesa de la Xunta Xeneral como'l futuru gobiernu y esclariar si tien previsto sofitase nesta llexislatura nun sociu de Vox como ye Foro.

"Esperamos que Barbón aclare darréu si se va sofitar nel secretariu del partíu que gobierna con Vox o sicasí va buscar l'alcuerdu de les fuerces d'izquierda pa un gobiernu estable", repitió güei Tomé nun comunicáu nel qu'asegura siguir esperando la llamada del xefe del Executivu pa negociar la investidura y "iguar un gobiernu progresista".