Podemos pide a Fernández qu'abandone les recetes del PP y mire al futuru

Fernández amplía la ufierta a Podemos pero píde-y "poner los pies nel suelu"

El voceru de Podemos na Xunta Xeneral, Emilio León, pidió güei al presidente del Principáu, Javier Fernández, qu'abandone "les recetes y fórmules fracasaes del Partido Popular que fixeron perder una década entera" y qu'apueste por polítiques de futuru que faigan sonrir a los asturianos.

"Nun pueden perdese otros 10 años, non yá los próximos 19 meses", afirmó León na segunda sesión del alderique sobro l'estáu de la rexón, nuna intervención na que reclamó al xefe del Executivu asturianu qu'asuma la llucha escontra la corrupción como "una cuestión crucial pa combatir el despilfarru" pero tamién la tesis de que "Asturies ye un país de pidiones que precisa que llegue'l dineru de fuera".

Na so opinión, "n'Asturies hai muncha bayura, pero ta mal distribuyida y nos bolsos que nun debe", daqué que podría superase con una reforma fiscal y la creación d'una unidá anticorrupción independiente del Gobiernu "que nun cuesta dineru y sí ayuda a recuperalo".

Según los cálculos de Podemos, la corrupción cuesta 500 euros al añu a cada asturianu, un dineru que con esta unidá podría recuperase.

León preguntóse si'l presidente ta en condiciones de garantizar que les sos polítiques van mirar escontra'l futuru y pidió-y qu'aclarie qué cuestiones ta dispuestu a incorporar frente a les fórmules fracasaes "que fixeron perder una década entera".

"Ésa ye la condición pa dexar de falar de techu de gastu y empezar a falar de techu pa tol mundu, falar de llistes d'esperanza y non d'espera y de cláusules sociales que faigan sonrir a les empreses asturianes, anque non a les redes clientelares", amestó.

Pa León, les polítiques del PSOE y del PP "nun revirtieron n'absolutu la situación y cada vez hai más desigualdá y crecen les diferencies con España y Europa" porque'l modelu que compartieron dambes formaciones "ta escosáu".

Sicasí, aseguró que "el PP nun ye n'absolutu alternativa" y qu'asina se vio no que calificó de "esperpéntica intervención" de la vocera popular, Mercedes Fernández, al entamu del alderique sobro l'estáu de la rexón.

"Nin teniendo la portería vacia meten gol", señaló'l voceru de Podemos en referencia al Partido Popular, enantes de reclamar al PSOE más rigurosidá no que resta de llexislatura porque, anque la reactivación colárase nos discursos, "nun entró nos llares".

En materia de vivienda, Podemos pidió al Gobiernu qu'asuma l'oxetivu de doblar el parque de viviendes sociales d'equí al añu 2030, que seyan 22.000 los pisos que formen parte del parque públicu, a pesar de que yá seya anguaño'l segundu más ampliu de toles comunidaes autónomes.

Al respective de la ufierta fecha ayeri por Javier Fernández pa caminar hacia una rede pública na educación de cero a tres años, León incidió en que "tien que ser una etapa pública y universal" que nun seya concebida namás como una aparcamientu de neños y que dexe a Asturies ser pionera nel ámbitu educativu.

En sanidá, el voceru de Podemos dixo que confía en que'l dictame de la comisión parlamentaria de les llistes d'espera ponga fin a cualquier desalcuerdu pa correxir esa situación, según el desfase qu'hai nel gastu farmacéuticu que pue redundar nun aforru añal de cien millones d'euros que puen dedicase a l'asistencia primaria y hospitalaria qu'eviten derivaciones.

Criticó l'empléu creciente que se creó nos últimos años y la xestión que se fixo del salariu social y alvirtío de que les families asturianes nun sintieron nin vivieron nengún ameyoramientu o síntoma de reactivación porque'l modelu de Rajoy esclúi a Asturies.

Fernández amplía la ufierta a Podemos pero píde-y "poner los pies nel suelu"

El presidente del Principáu, Javier Fernández, amplió güei al ámbitu de la vivienda la so ufierta de pactu presupuestariu a Podemos, qu'incluyía l'ampliación del ciclu educativu de 0 a 3 años y la Unidá Anticorrupción, al empar que reclamó a la formación morada que ponga "los pies nel suelu".

Na so respuesta a la intervención na segunda xornada del alderique sobro l'estáu de la rexón del voceru de Podemos, Emilio León, Fernández aseguró que ta dispuestu a llevar alantre si ye posible, como pide esa formación, doblar hasta l'añu 2030 el parque de viviendes públiques del Principáu.

En defendiendo la xestión del so Gobiernu nesi ámbitu y reconocer que, anque se dediquen 22 millones d'euros añales, sigue ensin ser abondo, el xefe del Executivu consideró tamién "insatisfactoria" la situación del primer ciclu d'educación infantil consorciáu hasta agora colos conceyos.

Frente al pidimientu de convertir en públicu esti ciclu y de facelu universal y gratuitu, el xefe del Executivu señaló que ta dispuestu a falar con Podemos pa faer "lo que se pueda" y a apurrir más recursos que los once millones añales que se destinen agora pa llograr que'l modelu que se ponga en marcha "funcione" y sirva realmente pa conciliar la vida familiar y llaboral.

Tamién tocante a la Unidá Anticorrupción plantegada por Podemos, Fernández repitió la so disposición a aceptala anque amosó la so esmolición pol costu que traería.

"El mundu ye como ye, convién tener los pies nel suelu", apuntó'l presidente asturianu en pidiendo a Podemos qu'aplique esi criteriu a la hora de definir la so política enerxética y asuma que la postura del so grupu sobro l'adelantu de la descarbonización y la medría del usu d'enerxía anovable tien consecuencies económiques "pa depués dicir que nun hai industria que defender".

Pa Fernández, Asturies "sí que tien industria que defender, hai que defendela y ustedes tendríen qu'ayudar y nun lo tán faciendo" señaló en recordando que'l zarru de toles térmiques traería una perda d'actividá nos puertos asturianos y amenorgaría notablemente l'actividá del sector del tresporte.

Amás, reclamó del partíu moráu que diga qué piensa del futuru modelu de financiamientu autonómicu, que s'apaute nun momentu nel que s'encara la deriva independentista en Cataluña yá que podría traer desigualdaes ente comunidaes.

"Nun tengo nenguna obsesión catalana, falo de lo que pue asoceder", apuntó tres emplazar a León, que-y reprochó que dexara la investidura de Mariano Rajoy, qu'esplique agora si se podía o non apautar colos nacionalistes y si son o non distintos a como yeren va un añu cuando Fernández sollertó del riesgu que suponía la deriva de Cataluña nun momentu d'inestabilidá política.