Probáu con éxitu nun gochu un respirador automáticu creáu en 3D

Pendiente de les validaciones médico-sanitaries pal so usu clínicu

El conseyeru de Ciencia, Anovación y Universidá, Borja Sánchez, señaló esti miércoles que tán tratando d'axilizase tolos trámites pa que'l prototipu de respirador creáu n'impresión 3D pa UCI puea contar cola certificación darréu pal so usu clínicu y poder esportalu a otres comunidaes autónomes y fuera d'España.

"La cuestión ye ser lo más áxiles que se puea ensin saltar nengún pasu que puea comprometer la seguridá d'estos dispositivos", señaló nuna rueda de prensa telemática na que dixo que'l prototipu va unviase a l'Axencia Estatal del Medicamentu y Productos Sanitarios pa la so validación.

El proyectu, entamáu pol equipu de Resistencia Team y nel que forma parte una alianza pública y privada, foi validáu con éxitu ayeri nun modelu animal.

Sobre'l númberu de dispositivos que podríen fabricase caldía, señaló que dependerá de los centros que presten los sos puntos de producción, poro, fizo un llamáu a les empreses que quieran participar pa que lo notifiquen al so departamentu.

El conseyeru dixo que, nel casu de ser validáu, abastecerá'l productu "nos llugares onde faga falta" y tampoco descartó que la so fabricación puea desendolcase fuera d'Asturies.

"La nuestra idea nun ye solo cubrir les necesidaes del Principáu, sinón tamién les d'otres rexones o otros países", manifestó enantes de señalar que'l Principáu ta viendo con "muncha esmolición" la evolución de la pandemia en Llatinoamérica.