Ramón Rodríguez cumple 80 años amosando bona parte de la so obra pictórica

L'artista dexa la so buelga, sobre manera n'Avilés, la so ciudá de nacencia

Nun edificiu del barriu d'El Carbayedo, n'Avilés, nació l’artista Ramón Rodríguez fai 80 años. Vivía cerca del centru nel qu'estudiaba, el que daquella yera l'Institutu Públicu Carreño Miranda, anguaño Colexu Públicu Palacio Valdés.

Reconoz que salía pitando de casa cuando oyía la campana. Tres estudiar Hestoria del arte y Pedagoxía n'Artes Plástiques, la so formación pictórica foi autodidacta, llogrando llueu dellos premios.

Pa celebrar los sos 80 años, d'ellos 60 dedicaos al arte, fai tres esposiciones paraleles que puen vese nel Centru Municipal d'Arte y Esposiciones, na Casa de Cultura y na Factoría Cultural. Un total de 180 obres escoyíes ente más de 400.

Tocante a la so obra pública, destaca la escultura Vulcano y Prometeo na ruta del Aceru de la ría d'Avilés o'l Proyectu Cromáticu de la Nueva Ponte de San Sebastián, seique la so obra más conocida y querida na so ciudá.

Tamién abondosa ye la so obra lliteraria, con cerca de 500 ensayos sobro arte contemporaneu y el so llabor como xestor cultural, actividá imparable qu'agora quier amenorgar.

Los sos nuevos proyectos, asegura, van tener que convivir cola so otra vocación, la de viaxar. El so deséu, afirma, ye poder siguir percorriendo'l mundu, lo que ye sinónimu de vivir y sentir.