Raquel Vega, campeona d'España y subcampeona del Mundu en Culturismu Natural

La l.lenense tien el so cuerpu musculáu a base de peses y bona alimentación, ensin sustancies dopantes

Sobre la mesa de la so casa de La Pola, Raquel Vega guarda trofeos y medayes, los postreros recibíos tres coronase Campeona d'España y Subcampeona del Mundu d'un deporte que munchos desconocen qu'esiste, el Culturismu natural, nel que nun tán dexaes nengún tipu de sustancies dopantes. Por eso, el so cuerpu tonificáu a golpe de peses nun se ve artificial y por eso munchos inda s'estrañen cuando diz que ye culturista.

La base del so entrenamientu son les peses, hasta consiguir llevantar en sentadines 85 quilos, el doble del so pesu. Entrenamientu, alimentación y lo más complicao, confiesa Raquel, posar nel escenariu pa marcar músculu

Lo meyor, diz, el compañerismu qu'hai en competición. Y otra cosa importante, nesti deporte la edá nun importa.

Raquel tien méritu porque compaxina'l Culturismu col so trabayu como responsable de circulación d'Adif. Una campeona con muncho futuru per delantre.​