Webcams
Buscar
Protesta a la que se xuntaron representantes de toles fuerces polítiques y sindicales
Centenares de persones concentráronse güei frente al Conceyu d'Avilés pa pidir la continuidá de les plantes d'Alcoa abocaes al zarru nuna protesta a la que se xuntaron representantes de toles fuerces polítiques y sindicales d'Asturies.
Ente ellos, tolos alcaldes de la contorna, cola rexidora d'Avilés, Mariví Monteserín, al frente, y representantes de tolos grupos políticos, que señalaron al Gobiernu central pa pidir una solución que revierta la situación.
El secretariu xeneral de CCOO d'Asturies, José Manuel Zapico, consideró que tanto'l Gobiernu central como la Xunión Europea puen afitar mecanismos pa evitar el zarru de la empresa y amosóse convencíu de que ye posible si hai voluntá política pa ello, porque la compañía tien "múltiple beneficios".
Pela so parte, el secretariu xeneral d'UXT-FICA d'Asturies, Jenaro Martínez, dixo que "Alcoa declaró la guerra al Gobiernu, a los sindicatos y a los trabayadores" y con eso, na so opinión, ta dexando clara la so decisión de zarru inxustificáu nun país onde tien ganancies.
Los trabayadores de la planta avilesina sintiéronse arropaos y sofitaos dende'l primer día del anunciu de zarru de la planta d'Avilés y güei na concentración frente al Conceyu.
El presidente del Comité d'Empresa, Sergio Sobrido, criticó la "falta de respetu enorme" nel comportamientu d'Alcoa y amosóse esperanzáu nuna nueva xunta ente'l Gobiernu central y la compañía pa torgar el zarru de les plantes d'Avilés y A Coruña, que sumen cuasi 700 empleos.
Sobrido sorrayó la necesidá de que la empresa se siente nuna mesa con voluntá de negociar "y non como si fueren los dueños del casino y fueren ellos los que marcaren les riegles del xuegu".
El secretariu xeneral de la Federación Socialista Asturiana (FSA), Adrián Barbón, amosóse convencíu de que'l Gobiernu de Pedro Sánchez va facer tolo que tea na so mano pa revertir la situación y pidió un frente común institucional ente los gobiernos autonómicos y locales afectaos, "pero tamién del d'España, porque eso ye fundamental".
Barbón garantizó que'l Gobiernu central ta asumiendo esti asuntu "como propiu" y cónsta-y que va dar un pasu al frente p'abrir la negociación "y forzar la maquinaria" pa que se retire'l despidu colectivu.
Tamién pidió que nun se xuegue "al electoralismu fácil pa intentar sacar la patina" porque ta en xuegu'l trabayu de dellos cientos de persones.
Pela so parte, el voceru de Podemos nel Parlamentu asturianu, Enrique López, enfeó'l comportamientu d'una empresa que recibió "munchos cientos de millones d'euros del dineru público en subvenciones" pero nun-y importa nin el futuru de los trabayadores nin el de la industria asturiana y, poro, el Gobiernu central "tien que pegar un puñetazu na mesa pa torgar el zarru".
L'alcaldesa d'Avilés conseñó que la fábrica tien que siguir funcionando y eso hai que dicilo "alto y claro" porque la contorna nun puede perder un activu como'l que representa l'aluminera.
"Sabemos toos qu'en frente namás tenemos un contrariu que ye Alcoa, que lo fixo bien mal y que nun pue colar asina", indicó Monteserín.
El calendariu de movilizaciones sigue'l sábadu con una marcha a pie dende la fábrica avilesina hasta la Delegación del Gobiernu d'Asturies, n'Uviéu, onde van ser recibíos pol so titular, Delia Losa.
