Riosa aprueba una declaración institucional de condena a la violencia

Ana Díaz: "Son amenaces de muerte que yo llevo, pero la mio familia non"

Riosa aprobó una declaración institucional de condena a la violencia. Tolos grupos afitáronla nun plenu estraordinariu dempués de les amenaces anónimes sufríes pola alcaldesa y l’ataque al coche d’unu de los conceyales el sábadu pasáu.

Amás reclamaben la máxima dilixencia na investigación abierta pa que s’alcuentre a los responsables tanto de los escritos anónimos como del ataque al coche del conceyal.

"Naide merez estos ataques anque paeza que por ser cargos públicos somos más vulnerables. Son amenaces de muerte que yo llevo, pero la mio familia non", señaló l’alcaldesa Ana Díaz, que díes dempués del asesinatu del edil d’IX en Llanes recibió un anónimu nel que se podía lleer: "Lo que-y pasó al to collaciu Ardines nun ye nada comparao colo que te va pasar a ti".

Per parte de so, el coordinador xeneral de IX-Asturies, Ramón Argüelles, a pesar d’alvertir de que les amenaces fáenlos "más fuertes", señaló que fai falta investigar y aclarar estos fechos porque ye una cuestión "mui seria" que se pue "dir de les manes" anque la Delegación del Gobiernu descartó de mano que dambes cuestiones tean rellacionaes.

A la condena y el refugu a estes amenaces espresada na concentración en Riosa, a la que fueron tamién representantes d’otres formaciones como PSOE y Podemos, amestáronse amás la xunta de portavoces del Parllamentu al traviés d’una declaración institucional aprobada por unanimidá polos grupos de la Cámara.

Asina, la Xunta Xeneral manifiesta la so enérxica condena énte les amenaces y ataques a cargos públicos municipales y refuga cualquier fechu qu’atente de forma directa o indirecta al exerciciu de la política y escontra la democracia, al entender que los cargos electos representen a tola ciudadanía.

Estes amenaces, amiesta la declaración, "son más refugables al invocar l’asesinatu del conceyal de Llanes Javier Ardines" y la Xunta fai amás un llamamientu a la ciudadanía a refugar esti tipu d’actos horribles y a collaborar coles Fuerces y Cuerpos de Seguridá del Estáu pal so esclarecimientu ceo.