Ripa, Piernavieja y Llaneza opten a la secretaría zeneral de Podemos Asturies

El próximu sábadu arrancará la campaña electoral de Podemos Asturies

Finalmente van ser tres les candidatures qu'opten a liderar Podemos Asturies. A la entamada por Daniel Ripa, qu'opta a la reelección como secretariu xeneral, súmense la liderada pol diputáu Héctor Piernavieja, al frente del sector críticu, y una tercera con Vanesa Llaneza nel puestu númberu unu.

El plazu pa presentar les llistes acabó la pasada media nueche. El próximu sábadu entamará la campaña electoral de Podemos Asturies y llegará al día 8.

Na llista "Asturies 2019", al secretariu xeneral y diputáu autonómicu Daniel Ripa acompáñenlu otros cinco diputaos que la formación morada tien na Xunta Xeneral del Principáu: Andrés Ron, Enrique López, Paula Valero, Lorena Gil y Emilio León. Esti últimu cierra la candidatura que ta encabezada pola conceyala de Xixón Sí Puede Nuria Rodríguez.

Pela so parte, el sector críticu entamáu pol diputáu Héctor Piernavieja inclúi, baxo la marca "Agora Asturies", nomes como los de la tamién parlamentaria Rosa Espiño, Nora Isabel Espina, asesora de la eurodiputada Estefanía Torres y Alba González, nel so casu asesora de Sofía Castañón, diputada nel Congresu.

La tercera de les candidatures, denomada "Desde Abajo", ta liderada pola ex-conceyala en Llangréu Vanesa Llaneza. Ente la trentena de nomes acompáñenla la conceyala de Mocedá de Llangréu, Charo Hernández, y los escritores Héctor Gómez Navarro y Javier García Cellino.

Llaneza esplica que la so ye una candidatura plural, que surde del descontentu cola actual dirección y cola que quieren un Podemos tresformador, que trabaye coldu con coldu colos movimientos sociales ensin absorbelos.